Omenaldian irakurritako testua

Arratsalde on guztioi

Hemen bildu gara hamahiru pertsonei omenaldi bat egiteko, toki honetan bertan, duela 71 urte hil zituzten eta. Hamahiru pertsona, batzuk oso gazteak, 16 urte besterik ez, bizitzen hasterako hiltzera kondenatuak. Bi emakume zeuden hamahiru lagun horien artean, genero berdintasunaren aldeko borrokaren adibide praktiko eta zoritxarrekoa, inolaz ere. Errepublika eta Euskal Herria defendatzea izan zen haien delitua.  Lege demokratikoa eta beren Herria defenditzea, hain zuzen.

Hamahiru pertsona, beste hainbatek bezala, beren bizitza arriskuan aartzeko duda izpirik izan ez zutenak beren Herria defenditzeko, kasu honetan Irun, militar faxisten erasoaren aurrean. Faxistak, armez josita, urteetako borroketan lortutako eskubideak kendu nahi izan zituzten, politika aniztasuna ezabatu, langileen erakundeak desagerrarazi, irakaskuntza publiko eta laikoarekin amaitu, euskara desagerrarazi, boteretsuen interesen baitara makurtu, eta periferiako nazionalismoaren aurrerabidea geldiarazi. Ezin dugu ahantzi Errepublika astindu zuen oihu hura “hobe Espainia hautsia ezen ez gorria”.

Gaur eskerrak eman nahi dizkiegu pertsona adoretsu hauei, gazte-gazte zirela, ia prestakuntza militarrik gabe eta baliabide eskasekin, beren herritarrak, beren ondorengoak, gu guztiok defenditzeko adorea izan zutelako.

Eskerrik asko hauei:

Mertxe López Cotarelo

Pilar Vallés Vicuña

José María Arruti Idiakez

Victor Genua

Jesús López Casado

Agapito Dominguez

Bernardo Usabiaga Jauregui

Manuel Justo Alberdi

Miguel López Pascual

Vicente Argote

Agustin Bermejo

Felix Luz Etxeberria

Angel Braña López

Eskerrik asko gu defenditzeagatik.

Gaur esan nahi dizuegu beti eramango zaituztegula bihotzean, zuen jarrera eredugarria izan zela, ez zaituztegula inoiz ahaztuko eta Errepublika eta Euskal Herria defenditzeagatik egin zenuten sakrifizioa, beste milaka askok egin zuten bezala, aitortua izan dadin lan egingo dugula

Informazio osoa....